Lina Brockdorfftwieldet l-Isla fil-21 ta’ Mejju, 1930. Hija waħda mill-kittieba nisa li l-aktar li kitbet, kemm proża u poeżiji. Ħadet sehem fix-xandir billi kitbet u pproduċiet numru kbir ta’ programmi fuq ir-Rediffusion bejn is-snin Ħamsin u s-Sebgħin. Fost dawn il-programmi kien hemm “Ħlieqa Bejnietna,” programm ta’ parlour games;programmi għan-nisa bħal “Quddiem il-Mera,” “Nofs Siegħa Flimkien” u “Kwarta Flimkien”, “Magic in the Kitchen” u reċti qosra umoristiċi. Kienet l-ewwel kittieba li bdiet taddatta għar-radju xeni drammatizzati minn “Wenzu u Rożi” mill-ktieb ta’ Dr George Zammit. Kellha wkoll serje ta’ programmi “Inwieġbu lis-semmiegħa.”

Kitbet numru ta’ radjudrammi fosthom “Il-Fqajjar t’Assisi,” radjudramm f’erba’ episodji li xxandar kemm fuq l-RTK (1990) kif ukoll fuq il-PBS (1999). Uħud mir-rumanzi tagħha nqraw ukoll fuq radjijiet hawn Malta u fl-Awstralja.

Għal bosta snin kitbet u pproduċiet il-programm letterarju tal-Għaqda Letterarja Maltija  bl-isem “Mill-Ġnejna Maltija”. Kienet il-President tal-istess Għaqda Letterarja Maltija għal tmien snin u membru tal-Akkademja tal-Malti u tal-Għaqda Poeti Maltin.

Kitbet aktar minn 340 novella, stejjer qosra li bosta minnhom ixxandru fuq radjijiet kemm hawn Malta kif ukoll l-Awstralja, waqt li bosta minnhom kienu ppubblikati fil-ġurnali.

Ippubblikat tnax-il rumanz fosthom Kien Kwinta l-Qamar (1974, 2008), La Jerġa’ Jasal Diċembru (2010),  Kastell għal Clara (2012),  Meta Jħammar il-Peprin (2013), Katrina (2015), Meta traxxax ix-Xita (2018) u Ladarba Dar ir-Riħ (2018). Sireni u Serenati (2004) huwa awtobijografija ta’ tfulitha ta’ matul it-Tieni Gwerra Dinjija u ħa l-ewwel premju tal-Kunsill Nazzjonali tal-Ktieb.

Brockdorff ippubblikat ukoll ħames antoloġiji ta’ novelli bl-isem ta’: Il-Bieb Numru 11 u stejjer oħra (2007),  Bellus u Bizzilla (2008), Intermezzi (2012), Ħin l-Istejjer (2016) u Minn Żmien l-Għerien (2018) u Qabel tbaxxi d-dawl (2019).

Lina kienet Viċi President fil-Kunsill ad interim tal-Akkademja tal-Malti (2004-2005) u fl-2020 l-Akkademja onoratha bil-Midalja tad-Deheb ‘Ġieħ l-Akkademja tal-Malti’.

Fl-okkażjoni ta’ din l-onorifiċenza, il-President ta’ Malta Dr George Vella feraħ lis-Sinjura Brockdorff u ddeskrivieha bħala “eżempju sabiħ ta’ anzjanità attiva” – persuna li ddistingwiet ruħha l-aktar b’ħidma fuq tul ta’ żmien għall-iżvilupp tal-Ilsien Malti u tal-letteratura.